love HISTORY

love letter
መሲህ፡ሰገድ፡አፄ፡በካፋ፡ለእቴጌ፡ምንትዋብ፡የፃፉት፡ጦማር። (ምናባዊ)
፲፻፯፳፩፡ዓመተ፡ምሕረት፡ጎንደር፡ኢትዮጵያ)
ጥበብ፡ከፍቅር፡ትገኝ፡ዘንዳ፡ህይወት፡እማኝ፡አትሆንምን? ምንትዋብ፡ አንችስ፡ከጎንደር፡ቆነዣዥት፡ትለይ፡ዘንዳ፡ፍጥረትሽ፡ምስክር፡አይቆምምን?ከጣና፡ዳር፡ወይዛዝርትስ፡ጋር፡አመልሽ፡ምን፡ጥጋ፡ጥግ፡አለው? ውበቴ፡ሆይ፡
ካንዤትሽ፡ሆነሽ፡ስሚኝ! አሁንም፡በወኅኒአምባ፡ከሚመላለሱት፡የነጋሲ፡ዘር፡
ልዕልቶች፡ትልቂያለሽ፡ሳይሆን፡ትለያለሽ፡አልሁ። ወይዘሮ፡እንኮዬ፡ምን፡ያህል፡
ብትዋቢባቸው፡ነው፡ምንትዋብ፡ያሉሽ?እኔም፡በመደነቅ፡ምስልሽን፡ለውድድር፡
ሳይሆን፡ለፍጥረት፡ሁሉ፡እይታ፡እንዲገባ፡የቅፅራችን፡ምልክት፡ከሆነው፡የፋሲለደስ፡ግንብ፡ጫፍ፡ሰቀልሁት። የተዋነይ፡ትንቢት፡ደርሶ፡ከነገስሁባት፡ቀን፡ዤምሮ፡እስተዛሬ፡እኔ፡ ንጉሥሽ፡ደምግባቴ፡ሆይ፡አንቺም፡ንግሥቴ፡ነበርሽ። ተይህ፡ሁሉ፡ዘበን፡በሁዋላ፡ መኳንንቱን፡ጠርቼ፡ግብር፡ካስገሁበት፡እልፍኝ፡ስመለስ፡ባጣሽ፡ግን፡አሽከር፡ የሆንሁ፡መሰለኝ። ደንገጡሮችሽንና፡የኔን፡ባለሟሎች፡ወዴት፡እንዳለሽ፡ብጠይቃቸው፡ተደፍቶ፡ከመንተባተብ፡ውጭ፡ደፍሮ፡የሚነግረኝ፡ልባም፡አጣሁ! ምንአልባች፡የጫንቃሽ፡ህመም፡አገርሽቶብሽ፡ወሸባ፡ቤት፡ገብተሽ፡ እንደሁ፡ብየ፡መዤመሪያ፡በአባቴ፡አዲያምሰገድ፡ቤተመንግሥት፡በኩል፡አለፍሁ፤
ንግስቴ፡ሆይ፡የለሽምና፡ፈራሁ።ወንድሜ፡አድባር፡ሰገድ፡ባሰራው፡ህንፃ፡በኩል፡
በቅሬና፡በደብተራ፡ዜማ፡ታዥቤ፡አንቺን፡እየቃኘሁ፡አለፍሁ።
ለነፍሴ፡የተገባሽ፡ፍቅሬ፡ሆይ፡እነሆ፡በዚያም፡የለሽም! ዛድያ፡ውዴ፡ወዴት፡አለሽ?
በአደናግር፡በር፡በኩል፡ወጥቼ፡ከእናትሽ፡እንኮየ፡መስክ፡ዠምሮ፡እስከ፡ እጨጌ፡ቤት፡ድረስ፡ጎንደርን፡በገረዶችሽና፡ባሽከሮቼ፡ትጋት፡አሰስኋት፤ነጋሪት፡ እየተጎሰመ፡ስኸድ፡ሕዝቤን፡በስግደት፡አደከምሁ፡እንዥ፡እታለሜ፡አንቺስ፡ በቀዬው፡አልነበርሽም! እንዴት፡የኔ፡ምንትዋብ፡በሚያከብረኝ፡ወገን፡መሐል፡ ስባክን፡ዝም፡ትይኛለሽ?
በተዋነይ፡ሞት! በተዋነይ፡ሞት!በዚህ፡ስዓት፡መጻሕፍትን፡እየመረመርሽ፡ ከዓለምሰገድ፡ንባብና፡ትርጓሜ፡እልፍኝ፡እንደምትኖሪ፡ዣንተከል፡ዋርካ፡ስደርስ፡ ትዝ፡አለኝ! መልከ፡መልካሟ፡ሆይ፡ንግሥናየን፡ዘንግቼ፡የክብር፡ልብሴ፡ከትከሻየ እስቲሸሽ፡ሮጥሁ፤በወይን፡መጥመቂያው፡ዘንዳ፡አልፌም፡ስደርስ፡አጉል፡ አረግሽኝ፡እንዥ፡አንቺስ፡ያለወትሮሽ፡በዚያም፡አልነበርሽም።
በልዑልነቴ፡ዘበን፡ዕለት፡ዕለት፡በደፈናው፡መደሰትን፡ለምዤ፡ነበር፤ በንጉሥነቴ፡ዘበን፡ግን፡ደስታና፡ሀገር፡መምራት፡ያለአንቺ፡አልሆንልህ፡ይለኝ፡ዤመር፤ዛድያ፡አሁን፡ስትጠፊብኝ፡ግዜ፡ከዓዕላፍ፡ሰገድ፡ውብ፡የፍቅር፡ግንብ፡ድረስ፡ሂጄ፡ተደፍቼ፡አለቀስሁ።አንዤቴም፡ሊራራልሽ፡ከዥሎት፦
“ቤተልቦናየን፡ዘንግቼ፡በቤተመንግሥት፡ፈለግኋት፡እንዥ፡እሷማ፡በልቤ፡ዙፋን፡
አሸልባለች፤መንቃቷም፡አይቀር!”እያለ፡ቆየ።ዳሩ፡እጅሽ፡በጫንቃየ፡ላይ፡ሲያርፍ፡
ከተሰወርሽበት፡መገለጥሽ፡በጀኝ፡እንዥ፡ቀርተሽማ፡ቢሆን፡እንዣልኝ፡
ምኑን፡ከምኑ፡አረገው፡ነበር?ይኸውና፡አሁን፡እንኋን፡የቀኑ፡እብደቴ፡
አልፎልኝ፡ይህን፡ጦማር፡ስጥፍልሽ፡እጄን፡በአፌ፡ጭኜ፡ነው፡ይልቅ፡
እታለሜ፡እኔ፡ስባባ፡አብረሽ፡መባባትሽ፡ለምን፡ኖሯል?ኋላሳ፡ሲያጠቃ
የኖረ፡ንጉስ፡የሚጠቃው፡በፍቅርም፡አይደል? እንኋንም፡አለቀስሁ፡
እንኋንም፡አጠቃሽኝ።